រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិក លោកស្រី Janet Yellen បានថ្លែងកាលពីថ្ងៃពុធថា លោកស្រីមិនច្រានចោលការចាត់វិធានការបន្ថែម ដើម្បីការពារឧស្សាហកម្មថាមពលស្អាតរបស់សហរដ្ឋអាមេរិក ពីការប្រកួតប្រជែងរបស់ចិនទេ។
លោកស្រីបានថ្លែងយ៉ាងដូច្នេះ ខណៈដែលលោកស្រីធ្វើដំណើរទៅប្រទេសចិន ដើម្បីធ្វើការពិភាក្សាចំនួនជិតមួយសប្តាហ៍ ដែលផ្តោតទៅលើការធ្វើឱ្យទំនាក់ទំនងហិរញ្ញវត្ថុ និង សេដ្ឋកិច្ច រវាងប្រទេសដែលមានសេដ្ឋកិច្ចធំជាងគេទាំងពីរក្នុងពិភពលោក កាន់តែមានស្ថិរភាព ។
ក្នុងអំឡុងពេលឈប់សំចតដើម្បីឱ្យយន្តហោះចាក់សាំងនៅរដ្ឋ Alaska លោកស្រី Yellen បានប្រាប់អ្នកសារព័ត៌មានថារដ្ឋបាលលោក Biden ចង់គាំទ្រការរីកចម្រើនរបស់ឧស្សាហកម្មបន្ទះស្រូបថាមពលព្រះអាទិត្យ រថយន្តអគ្គិសនី និង អាគុយ។
លោកស្រីមិនបានបញ្ជាក់ថាតើវិធានការថ្មីរបស់សហរដ្ឋអាមេរិក អាចមានរួមទាំងការយកពន្ធគយឬទេ។
លោកស្រី Yellen បានថ្លែងនៅមុនទស្សនកិច្ចរបស់លោកស្រីថា ការដែលចិនជួយផ្គត់ផ្គង់ឱស្សាហកម្មថាមពលស្អាត ឱ្យផលិតថាមពលច្រើនលើសលប់នោះ ធ្វើឱ្យប៉ះពាល់ដល់ក្រុមហ៊ុននិងបុគ្គលិកអាមេរិកាំង ព្រមទាំងក្រុមហ៊ុននិងបុគ្គលិកនៅជុំវិញពិភពលោក។
នេះជាទស្សនកិច្ចទី២របស់លោកស្រី Yellen ទៅកាន់ប្រទេសចិន ហើយទស្សនកិច្ចនេះធ្វើឡើង ក្រោយពីលោកប្រធានាធិបតីអាមេរិក Joe Biden និងមេដឹកនាំចិន លោក Xi Jinping បានសន្ទនាគ្នាតាមទូរស័ព្ទជាលើកដំបូង តាំងពីជំនួបក្នុងខែវិច្ឆិកាឆ្នាំមុន។ ទស្សនកិច្ចនេះថែមទាំងកើតឡើង ខណៈដែលការត្រួតពិនិត្យមើលសកម្មភាពរបស់ចិន កើនឡើងយ៉ាងខ្លាំង នៅមុនការបោះឆ្នោតប្រធានាធិបតីនៅសហរដ្ឋអាមេរិក និងខណៈដែលរដ្ឋាភិបាលក្រុងវ៉ាស៊ីនតោន រឹតបន្តឹងការហាមមិនឱ្យលក់ទំនិញដែលមានបច្ចេកវិទ្យាខ្ពស់ ទៅប្រទេសចិន។
វីអូអេសេវាភាសាចិនកុកងឺចូលរួមផ្តល់ព័ត៌មានដល់សេចក្តីរាយការណ៍នេះ។
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។
